"பெண்களுக்கு முழு சுதந்திரம் வாங்கிக் கொடுக்காத வரையிலும், பாட்டாளி வர்க்கம் முழு விடுதலையை அடைய முடியாது." - லெனின் [21.02.1920]
பெண்களின் உடல் உழைப்புகளை குடும்பத்திற்கு மட்டும் உபயோகித்துக் கொண்டு இழிவான அநீதியை பெண்களுக்கு ஏற்படுத்தி இருக்கிறது முதலாளித்துவம். இதன் மூலம் பெண்களை அடக்கி ஆளவும் எதற்கும் உபயோகமற்றவர்களாகவும் சித்திரித்து தங்கள் கட்டுக்குள் வைத்திருக்க முயல்கின்றனர்.
எங்கே நிலவுடைமையாளர்களும், முதலாளிகளும், வணிகர்களும் இருக்கிறார்களோ அங்கே சட்டத்தின்படி பெண்கள் ஆண்களுக்குச் சமமானவர்களாக இருக்க முடியாது.
எங்கே நிலவுடைமையாளர்களும், முதலாளிகளும், வணிகர்களும் இல்லையோ, எங்கே உழைக்கும் மக்களின் அரசாங்கம் சுரண்டல்காரர்கள் இல்லாத புதிய வாழ்க்கையை நிர்மாணித்துக் கொண்டிருக்கிறதோ அங்கே சட்டப்படி ஆண்களும் பெண்களும் சமமாக இருப்பார்கள்.
லெனின் சொல்கிறார்:
"பெண்களை முதலில் வீட்டை விட்டு வெளியேற்ற வேண்டும். ஆண்களுக்கு நிகராக பெண்களையும் சமூக முன்னேற்றத்திற்கு பயனுள்ள வகையில் உழைப்பு பங்களிப்பை செய்ய வைக்க வேண்டும்...
குழந்தை வளர்ப்பு, குடும்பத்தினருக்காக சமைப்பது, மற்றும் இதர வேலைகளை பெண்களுக்கான பொறுப்புகள் என்று அவர்கள் மீது திணிக்கப்பட்டு இருக்கிறது...
பெண்களின் உணர்ச்சிகள் மழுங்கிப் போகும்படி செய்து அவமானகரமான அடிமைத்தன வாழ்க்கையிலிருந்து பெண்களைக் விடுவித்து சமூக ரீதியில் பயனுள்ள உழைப்பில் ஈடுபடச் செய்ய வேண்டும்....
ஒவ்வொரு பெண்ணும் நிரந்தரமாகவே வீட்டுக்குள் புகுந்துக் கொண்டிருப்பதில் இருந்து வெளியேற வேண்டும். ஆண்களுக்கு இணையாக பெண்கள் தங்கள் உடல் உழைப்பை சமூகத்திற்காக பங்களிக்கும் போது ஆணுக்கு நிகராக பெண்கள் இருப்பார்கள் என்பதை யாராலும் மறுக்க முடியாது.
அதுவரை பெண் விடுதலை என்பது நீண்ட போராட்டமாகவே இருக்கும். மேலும் சமூகத் தொழில் நுட்பம், அறநெறிகள் ஆகியவற்றைத் தீவிரமாகப் புனரமைக்க வேண்டி இருக்கும். அதன் முடிவே கம்யூனிசத்தின் முழுமையான வெற்றியாகவும் இருக்க முடியும்"
என்கிறார் லெனின்.
லெனின் சோவியத் ஆட்சியில் ´பெண் விடுதலை´யை எப்படி நடைமுறைப்படுத்தினார்?
சோவியத் ஆட்சியின் 2-ஆம் ஆண்டு நிறைவு முன்னிட்டு லெனின் பேசியதை ´பிராவ்தா இதழ்´ - 11.06.1919, சோவியத் பத்திரிகை வெளியிட்டிருக்கிறது.
[அதில் இருந்து லெனினின் பெண் விடுதலையைக் குறித்த சிந்தனையை சுருக்கமாக இங்கே பதிவு செய்கிறோம்]
நாம் ஜனநாயகத்தை ஒழித்துவிட்டதாக முதலாளித்துவ வர்க்கத்தினரும் அவர்களுடைய ஆதரவாளர்களும் நம் மீது குற்றம் சுமத்துகிறார்கள்....
இந்த குற்றச்சாட்டை நாம் ஆழமாக புரிந்து கொள்வதற்கும், நம் செயல்பாட்டை ஆராய்வதற்கும், கடந்த இரண்டு வருட கால அனுபவத்தை மதிப்பீடு செய்வதற்கும், எதிர்கால வளர்ச்சிக்கு இன்னும் சிறந்த திட்டங்களை முன்னெடுக்கவும் முயற்சிக்க வேண்டியது அவசியமாகும்....
முதலாளித்துவ ஜனநாயகத்துக்கும், சோஷலிஸ்ட் ஜனநாயகத்துக்கும் உள்ள வேறுபாட்டை மிகவும் அழுத்தமான முறையில் தெளிவுபடுத்தி ஆணித்தரமான பதிலைக் கொடுப்பது சமுதாயத்தில் பெண்களின் நிலையே...
ஒரு முதலாளித்துவ குடியரசில் எவ்வளவு ஜனநாயகம் உள்ள நாடாக இருந்த போதிலும் தனிச் சொத்துரிமை இருக்கின்ற நாடான போதிலும் உலகத்தின் எந்தப் பகுதியிலும் அதிகமான முன்னேற்றம் அடைந்த நாட்டில் கூட பெண்களுக்கு ஆண்களைப் போல் முழு அளவுக்கு சமமான உரிமைகள் இல்லை.
பிரெஞ்சுப் புரட்சி நடைப்பெற்று 125- ஆண்டுகள் சென்றும் இந்நிலையே பெண்களுக்கு நீடிக்கிறது.
முதலாளித்துவ ஜனநாயகம் பெண்களுக்கு சமத்துவமும் சுதந்திரமும் கொடுக்கப்படும் என்று வார்த்தையளவில் மட்டுமே வாக்குறுதி கொடுத்துக் கொண்டிருக்கிறது. ஆனால் சட்டத்தில் கூட பெண்களுக்கு சமமான உரிமைகள் இருக்கவில்லை.
முதலாளித்துவ ஜனநாயகம் என்பது சுதந்திரத்தையும், சமத்துவத்தையும் பற்றி அலங்காரமான சொற்றொடர்களும் கம்பீரமான வார்த்தைகளும் மிதமிஞ்சிய வாக்குறுதிகளும் ஆர்பாட்டங்களுமாக ஒலிக்கும் கோஷங்களும் உள்ள ஜனநாயகமாகும். ஆனால் பெண்களின் உண்மை நிலையை அதாவது சமத்துவமும் சுதந்திரமும் இல்லாது இருப்பதை மூடி மறைக்கிறது.
ஆனால் ´சோவியத் ஜனநாயகம்´ அல்லது ´சோஹலிஸ்ட் ஜனநாயகம்´ என்பது புரட்டான பகட்டான போலியான வார்த்தைகளை அலட்சியப்படுத்துகிறது...
சோவியத் ஜனநாயகம் பாசாங்குத்தனத்தை வெறுக்கிறது...
ஒடுக்கப்பட்டவர்களுக்கும் ஒடுக்குவோர்களுக்கும் சுரண்டப்படுபவர்களுக்கும் சுரண்டுவோருக்கும் இடையே சமத்துவம் என்பது இல்லை. அப்படி ஏற்படவும் முடியாது.
ஆண்களுக்கு கொடுக்கப்பட்டிருக்கும் சட்டப்பூர்வமான தனி உரிமைகளால் பெண்குலம் பாதிக்கப்படும் வரை மூலதனத்திலிருந்து தொழிலாளிக்கு விடுதலை கிடைக்காத வரை முதலாளி நில உரிமையாளர் வணிகர் ஆகியோரின் அதிகாரத்தில் இருந்து உழைக்கும் விவசாயிக்கு விடுதலை கிடைக்காத வரையில் உண்மையான சுதந்திரம் என்பது கிடையவே கிடையாது.
ஐரோப்பாவில் மிகவும் அதிகமாகப் பின்தங்கிய நாடுகளில் ஒன்றில் சோவியத் ஆட்சி ஏற்பட்ட இரண்டு ஆண்டுகளில் ஆண்களுக்கு சமமாக பெண்களுக்கான விடுதலையை உருவாக்கி இருக்கிறது.
பெண்களுக்கு ஆணுக்கு இணையாக இல்லாத சட்டங்கள் சோவியத்தில் ஒழிக்கப்பட்டுவிட்டது. ஒடுக்கப்பட்ட பெண்ணினம் ஒடுக்கும் வர்க்கங்கள் சட்டங்கள் களையெடுக்கப்பட்டுக் கொண்டிருக்கின்றன. பெண்களுக்கு திருமண விலக்கு ஆண்களுக்கு இருக்கும் நிலையைப் போல் உருவாக்கப்பட்டிருக்கிறது.
"ஒடுக்கப்பட்ட பெண்ணினத்துக்கு சுதந்திரமும், சமத்துவமும்...."
"தொழிலாளிகளுக்கும், உழைக்கும் விவசாயிகளுக்கும் சுதந்திரமும், சமத்துவமும்..."
"ஒடுக்குபவர்களுக்கு எதிராக, முதலாளிகளுக்கு எதிராக, ஏழை விவசாயிகளைச் சுரண்டும் பணக்கார விவசாய உடைமையாளர்களுக்கு எதிராகப் போராட்டம்..."
இதுவே நமது போர் முழக்கம்! இதுவே நமது பாட்டாளி வர்க்க உண்மை!! மூலதனத்துக்கு எதிரான போராட்டத்தைப் பற்றிய உண்மை.
[ இதுவரை லெனின் பேசியது சோவியத் ஆட்சியின் 2-ஆம் ஆண்டு நிறைவு தினத்தை முன்னிட்டு பெண் விடுதலை குறித்து பேசியது....]
"சோவியத் குடியரசில் உழைக்கும் பெண்கள் இயக்கத்தின் கடமைகள்" என்னும் தலைப்பில் செப்டம்பர் 23, 1919-இல், ´மாஸ்கோ நகர பெண்கள்´ மாநாட்டில் லெனின் பெண்கள் நிலை குறித்து பேசும் போது கூறுகிறார்:
"........ மேற்கு ஐரோப்பாவில் உருவாகிய விடுதலை இயக்கங்கள் செல்லரித்துப் போன சட்டங்களை ரத்து செய்யப்பட வேண்டும். ஆண்களுக்கும் பெண்களுக்கும் சமநிலை சட்டங்கள் உருவாக்கப்பட வேண்டும் என போராடி வருகின்றன......
இப்போராட்டம் நூறாண்டுகளாக நடைப்பெற்று வந்த போதும் கடந்த 10- ஆண்டுகளாக கடுமையான முயற்சியில் விடுதலை இயக்கங்கள் ஈடுபட்டிக் கொண்டிருக்கின்றன. ஆனால் ஜனநாயக குடிஅரசு மேற்கு ஐரோப்பிய நாடுகளில் இக்கோரிக்கைகள் நிறைவேற்றப்படாமலே இருக்கின்றன.
ஏனெனில் எங்கே முதலாளித்துவம் இருக்கிறதோ, எங்கே நிலத்திலும், தொழிற்சாலைகளிலும், தனியுடைமையும் மூலதனமும் இருக்கிறதோ, எங்கே இதற்காக ஆதிக்கம் பாதுகாக்கப்படுகிறதோ அங்கே ஆண்களுக்கென்று தனி உரிமைகள் இருக்கின்றன.
சோவியத் ஆட்சி உழைக்கும் மக்களின் ஆட்சி. 1917-அக்டோபர் 25-முதல் தொழிலாளர் ஆட்சி நிறுவப்பட்ட முதல் மாதத்திலேயே பெண்களுக்கு அடிமைத்தனம் ஒழிக்கப்பட வேண்டும் என்ற நோக்கில் சட்டத்தில் புரட்சி ஏற்படுத்தியது. பெண்களை கீழான நிலையில் வைத்திருக்க முயன்ற சட்டங்கள் ஒழித்துக் கட்டப்பட்டது.
பெண்களின் பலவீனமான நிலையைப் பயன்படுத்திக் கொண்டு அவர்களை சமத்துவம் இல்லாத நிலைமையில் பெரும்பாலும் அவமானகரமான நிலைமையில் கூட வைத்திருந்த சட்டங்களை ஒழித்துக்கட்டியது.
இதில் பெண்களுக்கு விவகாரத்து செய்து கொள்ளும் உரிமையும், திருமணம் ஆகாமல் பெற்ற குழந்தைகளுக்காக சட்ட திட்டங்கள் மாற்றப்பட்டதும், குழந்தை வளர்ப்புக்கான தேவையான பணம் தந்தை கொடுக்க வேண்டும் என உருவாக்கப்பட்ட சட்டங்களையும் இங்கே பிரத்யேகமாகக் குறிப்பிடுகிறேன்.
முதலாளித்துவ சட்டங்கள் குறிப்பாக பெண்களின் பலவீனமான நிலையைப் பயன்படுத்திக் கொண்டு அவர்களை அவமானப்படுத்தி அவர்களுக்குக் கீழான நிலையைக் கொடுத்தன. ஆனால் சோவியத் ஆட்சியில் பெண்கள் முழு சமத்துவத்தை அனுபவிக்கும் நாடாக மாற்றப்பட்டு இருக்கிறது. உலகில் வேறெங்கிலும் பெண்களுக்காக சட்டங்கள் திருத்தப்படவோ ஆண்களுக்கு சமமான உரிமையை சட்டத்தில் பெண்களுக்கு கொடுக்கப்படவோ இல்லை என்பதை நாம் பெருமையோடு கூறமுடியும்.
ஆனால் எல்லா ஜனநாயகக் குடிஅரசுகளிலும் சமத்துவம் பிரகடனம் செய்யப்படுகிறது என்பதை நாம் பார்க்கிறோம். ஆனால் சிவில் சட்டங்களிலும், குடும்பம், விவகாரத்து உட்பட்ட சட்டங்களும் பெண்களுக்கான எந்த சமத்துவமும் இல்லாமல் பெண்களை அவமதிக்கப்படுவதையும் நாம் காண்கிறோம்.
சோவியத் ஆட்சியிலும் பெண்களுக்கான சட்டங்கள் மாற்றப்பட்டதும் அதற்கான உத்தரவுகளை போடுவதிலும் நாங்கள் திருப்தி அடையவில்லை. எனினும் சட்டத்துறையைப் பொறுத்தவரையிலும் பெண்களுக்கு சமத்துவ உரிமைகளைக் கொடுப்பதற்கு நாங்கள் செய்ய வேண்டிய ஒவ்வொன்றையும் செய்துவிட்டோம். இதைப்பற்றி பெருமைப்படுவதற்கு நமக்கு எல்லா உரிமையுமுண்டு. மிகவும் வளர்ச்சியடைந்த நாடுகளுடன் ஒப்பிடும்போது சோவியத் ருஷ்யாவில் பெண்களின் நிலை இலட்சிய வடிவத்தை அடைந்துவிட்டது. எனினும் இது ஆரம்பமே என்று நாம் சொல்கிறோம்.
வீட்டில் செய்கின்ற வேலையின் காராணமாகப் பெண்கள் இன்னும் கடினமான நிலையில் தான் இருக்கிறார்கள். பெண்களுக்கு முழுவிடுதலை கொடுத்து ஆண்களுக்கு சமமாக பெண்களை உருவாக்க வேண்டுமென்றால் தேசியப் பொருளாதாரம் சமூக மயமாக்கப்படுவதும், பொதுவான பயனுள்ள உழைப்பில் பெண்கள் ஈடுபடுவதும் அவசியம். அப்பொழுது தான் பெண்கள் ஆண்களுக்குச் சமமான நிலையைப் பெறுவார்கள்.
உழைப்பின் உற்பத்தித் திறன் உழைப்பின் அளவு நானொன்றுக்கு வேலை செய்யும் நேரம் உழைப்பு நிலைமைகள் மற்றும் பலநிலை உழைப்பு நிலைமையிலும் பெண்களை ஆண்களுக்குச் சமமான நிலைமையில் வைக்கப்போவதாக நாம் சொல்லவில்லை. குடும்பத்தில் பெண்களுக்கு இருக்கின்ற நிலைமை காரணமாக பெண் ஒடுக்கப்படக் கூடாது (ஆண்களுக்கு இந்நிலை இல்லை) என்பதற்காகவே நாம் குறிப்பிடுகிறோம்.
பெண்கள் முழு உரிமைகளைக் பெற்றிருந்தாலும் கூட அவர்கள் உண்மையில் இன்னும் அடக்கி வைக்கப்பட்டவர்களாகத்தான் இருக்கிறார்கள். ஏனெனில் வீட்டு வேலைகள் அனைத்தும் பெண்களுக்காகவே ஒதுக்கப்படுகிறது. வீட்டு வேலைகள் என்பது பெண்களுக்கு பயனற்றதாகவே இருக்கிறது. ஒரு பெண்ணின் வளர்ச்சியை எந்த விதத்திலும் ஊக்குவிக்கக்கூடிய உழைப்பு அதில் இல்லை.
பெண்களைக் குடும்ப வேலைகளிலிருந்து விடுவிக்கக் கூடிய குழந்தை வளர்ப்பு நிலையங்கள் உணவுச் சாலைகள் முன் மாதிரியான அமைப்புகள் ஏற்பத்தப்பட்டுக் கொண்டிருக்கிறது.
எனினும் பெண்கள் கவனத்திற் கொள்ளப்பட வேண்டியதையும் கூறுகிறோம்:
தொழிலாளர்களுடைய விடுதலையைத் தொழிலாளர்களே ஏற்படுத்திக் கொள்ள வேண்டும் என்று நாம் சொல்கிறோம் அதைப் போலவே உழைக்கும் பெண்களின் விடுதலையும் உழைக்கும் பெண்களாலேயே ஏற்பட வேண்டும்.
பழைய முதலாளித்துவ ஆட்சி முறையில் பெண்களுக்கு அரசியலில் சரியான பங்களிப்பு ஏற்படுத்தப்படவில்லை. ஆண்களுக்கு அரசியலில் இருக்கும் பங்களிப்பை விட மிக சொற்பமான அளவிலேயே பெண்களின் இடம் இருக்கிறது.
இம்முறையை நாம் மாற்றியாக வேண்டும்.
ஒவ்வொரு உழைக்கும் பெண்ணும் அரசியலில் பங்கெடுத்துக் கொள்வதை சாத்தியமாக்குவது நமது கடமையாகும்.
யுத்த சூழல்களிலும் பெண்கள் இராணுவத்தில் உழைக்க வேண்டும். இராணுவத்திற்கு ஏதோ ஒருவகையில் தங்களால் ஆன பங்களிப்பு செய்ய பெண்கள் முயல வேண்டும்.
மீண்டும் கூறுகிறோம்....
சோஷியலிஸ்ட் இலட்சியத்தைப் பின்பற்றி சோஷலிசத்தை அமுலாக்குவதற்காக நாம் போராட விரும்புகிறோம். பெண்கள் சமுகத்தில் உழைப்பதற்குரிய விரிவான துறை ஏற்படுகிறது. சோஷலிசத்தை நிர்மாணிப்பதற்காக நாம் ஈடுபட்டிருக்கிறோம். ஆனால் பெண்களுக்கு முழுமையான சமத்துவம் அளிக்கப்பட்டு பயனற்ற உழைப்பிலிருந்து விடுதலையடைந்த பெண்களோடு சேர்ந்து நாம் இந்தப் புதிய வேலையை எடுத்துக் கொண்டால் தான் சோஷலிச நிர்மாணம் ஆரம்பமாகும்...
சோஷலிசத்தின் வேலைத்திட்டம் செயல்படுத்த ஆரம்பித்துவிட்டோம்.
இது தொடக்கம் மட்டுமே...
இவை வேலைத்திட்டத்தை முடிக்க பல வருடங்கள் தேவைப்படும்.
இவை பெண்களின் ஒத்துழைப்பினால் மட்டுமே சாத்தியமாகும்.
மீண்டும் கூறுகிறோம்....
"தொழிலாளர்களுடைய விடுதலையைத் தொழிலாளர்களே ஏற்படுத்திக் கொள்ள வேண்டும் என்று நாம் சொல்கிறோம். அதைப் போலவே உழைக்கும் பெண்களின் விடுதலையும் உழைக்கும் பெண்களாலேயே ஏற்பட வேண்டும்."
தமிழச்சி
16.06.2010
