10212020Wed
Last updateTue, 20 Oct 2020 6pm

ஒபாமாவுக்கு சிவப்புக் கம்பள வரவேற்பு! தேசிய அவமானம்!! -புரட்சிகர அமைப்புகளின் பிரச்சாரம்-ஆர்ப்பாட்டம்

உலக மக்களின் எதிரியான அமெரிக்க மேல்நிலை வல்லரசின் அதிபர் பாரக் ஒபாமாவின் இந்திய வருகையை எதிர்த்து நாடெங்கும் இடதுசாரி இயக்கங்களும் புரட்சிகர ஜனநாயக சக்திகளும் கடந்த நவம்பர் 8ஆம் தேதியன்று ஆர்ப்பாட்டங்களையும் பேரணிகளையும் கடையடைப்புப் போராட்டங்களையும் நடத்தின. அமெரிக்கக் கொலைகார யூனியன் கார்பைடு நிறுவனத்தின் நச்சு வாயுவால் நடைபிணங்களாகி விட்டவர்கள் போபாலில் ஒபாமாவுக்கு எதிராக ஆர்ப்பாட்டங்களை நடத்தினர். அமெரிக்க மான்சாண்டோவின் பி.டி. பருத்தியால் இந்தியாவில் பல்லாயிரக்கணக்கான விவசாயிகள் போண்டியாகி தற்கொலைக்குத் தள்ளப்பட்டதை எதிர்த்து, கணவனை இழந்து விதவைகளாகிவிட்ட விவசாயத் தாய்மார்கள் ""கொலைகார அமெரிக்காவின் அதிபரே, திரும்பிப் போ!'' என்று விதர்பா பிராந்தியத்திலுள்ள ஹிவாரா கிராமத்தில் பேரணியும் ஆர்ப்பாட்டத்தையும் நடத்தினர்.

 

உலக மேலாதிக்க பயங்கரவாத அமெரிக்க வல்லரசின் அதிபரான ஒபாமாவின் வருகையை எதிர்த்துத் தமிழகமெங்கும் ம.க.இ.க வி.வி.மு பு.மா.இ.மு பு.ஜ.தொ.மு பெ.வி.மு. ஆகிய அமைப்புகள் தாங்கள் செயல்படும் பகுதிகளில் வீச்சான பிரச்சாரத்தை மேற்கொண்டதோடு, இந்திய நாடாளுமன்றத்தில் ஒபாமா உரையாற்றிய நவம்பர் 8ஆம் தேதியன்று தமிழகத்தின் பல பகுதிகளில் ஆர்ப்பாட்டங்களை நடத்தின.

 

அமெரிக்காவின் உலக மேலாதிக்கப் போர்த்தேரில் இந்தியாவைப் பிணைத்து விசுவாச அடியாளாக உறுதிப்படுத்துவதோடு, அமெரிக்க முதலீட்டுக்கு கதவை அகலத் திறக்குமாறு இந்தியாவை நிர்ப்பந்தித்து, நாட்டையும் மக்களையும் காவு கொள்ளும் ஒப்பந்தங்களை நிறைவேற்ற வந்துள்ள ஒபாமாவின் வருகையை எதிர்த்தும், அவருக்கு வரவேற்பு அளிப்பது நாட்டுக்கே அவமானம் என்பதை விளக்கியும், அமெரிக்க கைக்கூலி மன்மோகன் சிங்கின் சதிகளை அம்பலப்படுத்தியும், அமெரிக்காவின் தலைமையில் நாடு மீண்டும் காலனியாக்கப்படுவதை எதிர்த்தும் திருச்சி புத்தூர் நாலு ரோட்டிலும், தஞ்சை பனகல் கட்டிடம் அருகிலும், கடலூர் மஞ்சக்குப்பம் ஏ.எல்.சி. சர்ச் அருகிலும், சென்னை குரோம்பேட்டையிலும், உடுமலை மையப் பேருந்து நிலையம் அருகிலும், கோவை செஞ்சிலுவைச் சங்கம் அருகிலும் இவ்வமைப்புகள் எழுச்சிமிகு கண்டன ஆர்ப்பாட்டங்களை நடத்தின.

 

புரட்சிகரப் பாடல்களோடும் விண்ணதிரும் முழக்கங்களோடும் நடந்த இந்த ஆர்ப்பாட்டங்கள், உழைக்கும் மக்களிடம் ஒபாமா பற்றிய மாயையைத் திரைகிழித்துக் காட்டிப் போராட அறைகூவுவதாக அமைந்தன. பு.ஜ. செய்தியாளர்கள்.


இந்தியா, அமெரிக்காவின் சுமைதாங்கியானது

கடந்த நவம்பர் 6ஆம் தேதி முதலாக நாளொன்றுக்கு 900 கோடி ரூபாய் செலவில் மூன்றுநாள் அரசு முறைப் பயணமாக இந்தியாவுக்கு வருகை தந்தார், அமெரிக்க அதிபர் ஒபாமா. இந்திய ஆளும் வர்க்க ஊடகங்கள் ஏதோ தேவதூதர் பூமிக்கு எழுந்தருளியதைப் போல வானளாவப் புகழ்ந்து, அவரைத் துதிபாடின. சிறுவர்களுடன் சேர்ந்து அவர் ஆடிய டப்பாங்குத்து டான்சையும், அவரது மனைவி பாண்டி விளையாடியதையும் அவரது "எளிமை'யையும் வியந்தோதி, ஒபாமாவின் இந்திய வருகையால் அமெரிக்க முதலீடு அதிகரித்து நாட்டில் பாலாறும் தேனாறும் பாய்ந்தோடப் போவதைப் போல, ஒரு கீழ்த்தரமான சினிமாவை இந்திய ஊடகங்கள் விளம்பரப்படுத்தின.

 

இந்திய வருகைக்கு முன்னதாக ""நியூயார்க் டைம்ஸ்'' நாளேட்டில் ஒபாமா எழுதிய கட்டுரையில், ""நமது ஒவ்வொரு பில்லியன் டாலர் ஏற்றுமதிக்கும் அமெரிக்காவில் ஆயிரம் பேருக்கு வேலை கிடைக்கும். இந்தியச் சந்தையில் தங்கு தடையின்றி நாம் நுழைவதற்கான சூழலை உருவாக்குவதே எனது பயணத்தின் நோக்கம். அமெரிக்காவில் வேலை வாய்ப்பைப் பெருக்குவதே உடனடி இலட்சியம்'' என்று குறிப்பிட்டுள்ளதிலிருந்து அவரது இந்தியா மற்றும் பிற ஆசிய நாடுகளுக்கான பயணத்தின் நோக்கத்தை யாவரும் புரிந்து கொள்ள முடியும்.

 

தங்களுடைய உற்பத்திப் பொருட்களுக்கு வளரும் நாடுகள் சந்தையை அகலத் திறந்து விட வேண்டும் என்பதுதான் அமெரிக்காவின் எதிர்பார்ப்பு. ""உலக வர்த்தகக் கழக விதிகளின்படி, இந்த விசயத்தில் சம அளவிலான போட்டி இருக்க வேண்டும்; எனவே, உங்கள் நாட்டு விவசாய உற்பத்திக்கும் விளைபொருட்களுக்கும் நீங்கள் கொடுக்கும் மானியத்தைக் குறையுங்கள்'' என்கின்றன வளரும் நாடுகள். இது அமெரிக்காவுக்குச் சங்கடமாக இருக்கிறது. இதனால்தான் கொல்லைப்புறமாக இந்தியா மற்றும் பிற வளரும் நாடுகளுடன் பேரங்கள், ஒப்பந்தங்கள் மூலம் இச்சிக்கலிலிருந்து தப்பிக்க முயற்சிக்கிறது, அமெரிக்கா.

 

எனவேதான், ""அமெரிக்காவில் 50 ஆயிரம் வேலை வாய்ப்புகளை உருவாக்குவதற்காக 44 ஆயிரம் கோடி ரூபாய் மதிப்பிலான வரலாற்று முக்கியத்துவம் வாய்ந்த பல ஒப்பந்தங்கள் இந்தியாவுக்கும் அமெரிக்காவுமிடையே கையெழுத்தாகியுள்ளன. இந்த ஒப்பந்தங்கள் மூலம் இரு நாடுகளுக்கிடையிலான வர்த்தகம் அடுத்த ஜந்தாண்டுகளில் இரட்டிப்பாகும்'' என்று அறிவித்த ஒபாமா, ""அமெரிக்காவின் 12வது வர்த்தகப் பங்குதாரராக உள்ள இந்தியா, முதன்மைப் பங்குதாரராக வருவதற்கு வர்த்தகத் தடைகளை நீக்க வேண்டும்'' என்று நிபந்தனை விதித்து இந்தியஅமெரிக்க வர்த்தகக் கவுன்சில் கூட்டத்தில் பேசினார். அமெரிக்க அயலுறவு அமைச்சகத்தின் செய்தித் தொடர்பாளரான கிராவ்லி, அதிபர் ஒபாமாவின் இந்தியப் பயணம் எதிர்பார்த்த அனைத்தையும் சாதித்து விட்டது என்று ஊடகங்களுக்கு விளக்கியுள்ளார். மொத்தத்தில் அமெரிக்காவின் பொருளாதார நெருக்கடியின் சுமைகளை இந்தியாவின் தலையில் பகுதியளவுக்கு ஏற்றிவிட்டு, அமெரிக்காவின் பொருளாதாரத்தை மேம்படுத்தவும் அமெரிக்க முதலாளிகளின் ஆதாயத்திற்காகவுமே ஒபாமா இந்தியாவுக்கு வந்து ஒப்பந்தங்களைப் போட்டுள்ளார்.

 

இந்த ஒப்பந்தங்களின்படி, சில்லறை வணிகம், வங்கி காப்பீடுதுறை, விவசாயம், உயர்கல்வி முதலானவற்றில் அமெரிக்க முதலீட்டுக்குக் கதவை அகலத் திறந்து விடுவதன் மூலம் இந்திய நாடு முற்றாக அமெரிக்காவின் இரும்புப் பிடியில் சிக்கிக் கொள்ளும். அமெரிக்காவின் வால்மார்ட்டும், மான்சாண்டோவும், தீவட்டிக் கொள்ளை நிதி நிறுவனங்களும், டப்பா பல்கலைக்கழகங்களும் வரை முறையின்றி நாட்டைச் சூறையாடும். அமெரிக்காவின் அயல்பணி (அவுட்சோர் சிங்) களைச் செய்து வந்த இந்தியாவுக்கு இனி வரம்புகள் நீடிக்கும். இவை தவிர, இந்தியாவின் உள்கட்டமைப்பு வசதிகளை மேம்படுத்த இரு நாடுகளும் இணைந்து தனியார் பங்கேற்புடன் 1000 கோடி டாலர் தொகையுடன் நிதித் தொகுப்பு உருவாக்குவது, இந்தியாவின் உணவுப் பாதுகாப்பை உறுதிசெய்ய நீடித்த பசுமைப் புரட்சிக்கு ஒத்துழைப்பு என ஒபாமா வருகையையொட்டி ஒப்பந்தங்கள் கையெழுத்தாகியுள்ளன.

 

இத்தகைய வர்த்தக ஒப்பந்தங்களைவிட, இராணுவ மற்றும் அணுஉலை தொடர்பான ஒப்பந்தங்கள் முக்கியமானது. இந்திய அமெரிக்க அணுசக்தி ஒப்பந்தத்தைத் தொடர்ந்து அணு உலைகளை அமைப்பதிலும் இந்திய அரசு அந்நிய முதலீடுகளை அனுமதித்துள்ளது. ஏகாதிபத்திய நாடுகளில் கழித்துக் கட்டப்பட்ட அணு உலைகளை இந்தியாவில் நிறுவி அதில் விபத்து ஏற்பட்டால், அதற்கான பொறுப்பிலிருந்து அந்நிய முதலாளிகளைக் கழற்றிவிடும் வகையில் புதிய சட்டத்தையும் அண்மையில் மன்மோகன் சிங் அரசு நிறைவேற்றியுள்ளது. கடந்த நவம்பர் 8ஆம் தேதியன்று ஒபாமாவும் மன்மோகன் சிங்கும் கையெழுத்திட்டுள்ள ஒப்பந்தத்தில், விபத்து ஏற்பட்டால் அணுஉலையை வழங்கிய அமெரிக்க முதலாளிகள் மீது அணுஉலையை இயக்குபவர்கள் எந்த வகையிலும் இழப்பீடு கோர முடியாது என்று உறுதிப்படுத்தப்பட்டுள்ளது. வெஸ்டிங்ஹவுஸ், ஜெனரல் எலக்ட்ரிக் ஆகிய அமெரிக்க நிறுவனங்களிடமிருந்து அணு உலைகளைப் பெறத் தடையாகவுள்ள அணுவிபத்து இழப்பீடு சட்டத்திலுள்ள விதிகளை, வருமாண்டிற்குள் இந்தியா திருத்தியமைத்துக் கொள்ளவேண்டும் என்றும் குறிப்பிடப்பட்டுள்ளது.

 

தெற்காசியாவில் அமெரிக்காவின் மேலாதிக்கப் போர்த்தந்திரத் திட்டங்களுக்குத் துணை நிற்கும் நம்பகமான அடியாளாக இந்தியாவை நிலைநாட்டுவதே அமெரிக்காவின் நிகழ்ச்சி நிரலாகும். ஒபாமாவின் ஒப்பந்தங்களின்படி, இந்திய விமானப்படைக்கு நீண்டதூரம் டாங்கிகள் உள்ளிட்ட கனரக ஆயுதத் தளவாடங்களைக் கொண்டு செல்லக் கூடிய அமெரிக்காவின் போயிங் நிறுவனத் தயாரிப்பான சி17 ரக விமானங்கள் பத்து இந்தியாவின் தலையில் கட்டப்பட்டுள்ளன.

 

அமெரிக்காவின் காலனியாதிக்கக் கொடுங்கோன்மை தொடரும் ஆப்கானிஸ்தானில், அமைதி மற்றும் வளர்ச்சிப் பணிகளில் இந்தியாவுக்கு கூடுதல் இடமளிக்கப்படும் என்று ஒபாமா கூறியுள்ளார். ஆப்கானில் நேரடியாக நேட்டோ படைகளுடன் இணைந்து போர்த் தாக்குதல் நடவடிக்கைகளில் இந்தியா ஈடுபடாது என்றாலும், ஆப்கான் தேசியப் பாதுகாப்புப் படைக்குப் பயிற்சியளிக்கும் வேலையில் ஈடுபடும். தரகுப் பெருமுதலாளிகள் ஆப்கானில் கட்டுமான மறு சீரமைப்புப் பணிகள், இராணுவப் பயிற்சி முதலானவற்றின் மூலம் ஆதாயமடைய முடியும் என்பதால் இத்திட்டத்தைப் பேருற்சாகத்துடன் வரவேற்கின்றனர்.

 

இராணுவத் தளவாட உற்பத்தியில் நேரடி அந்நிய முதலீட்டை 26 சதவீதத்திலிருந்து 49 சதவீதமாக இந்தியா உயர்த்தியிருப்பதும், வரும் மார்ச் மாதத்திற்குள் ஏறத்தாழ ஒன்றரை லட்சம் கோடிகள் மதிப்பில் இராணுவத் தளவாடங்களை ஏகாதிபத்திய நாடுகளிலிருந்து இறக்குமதி செய்ய பட்ஜெட்டில் ஒதுக்கீடு செய்யப்பட்டுள்ளதையும் இணைத்துப் பார்த்தால், இந்தியா எவ்வாறு தெற்காசிய வட்டகையில் அமெரிக்கா தலைமையிலான ஏகாதிபத்தியங்களின் பங்களா நாயாக வளர்க்கப்படுகிறது என்பதைப் புரிந்து கொள்ள முடியும்.

 

இந்தியாவுக்கு வந்த ஒபாமா, பாகிஸ்தானை கண்டித்து அடக்கிவைப்பார், ஜ.நா. பாதுகாப்பு அவையில் இந்தியா நிரந்தர இடம்பெற உதவுவார் என்ற ஆளும் வர்க்கங்களின் எதிர்பார்ப்பும் பொய்த்துப் போய்விட்டது. ஜ.நா. மறுசீரமைப்பு செய்யப்படும்போது நிரந்தர இடத்தைப் பெற, இந்தியா அடுத்த இரண்டு ஆண்டுகளில் அதில் நிரந்தரமற்ற உறுப்பினராக இருந்து எடுக்கும் நிலைப்பாடுகள்தான் உதவும் என்கிறார், ஒபாமா. தனது மேலாதிக்க நோக்கங்களுக்கு அடங்க மறுக்கும் ஈரான், வடகொரியா, கியூபா முதலான நாடுகளின் மீது அமெரிக்கா விதித்துள்ள ஒருதலைப்பட்சமான பொருளாதாரத் தடைகளை இந்தியா விசுவாசமாக ஆதரிக்க வேண்டும்; நாளை இன்னும் இதர நாடுகள் மீது அமெரிக்கா மேற்கொள்ளும் தாக்குதல் நடவடிக்கைகளையும் ஆதரிக்க வேண்டும் என்பதுதான் இதன் பொருள்.

 

அமெரிக்க மேலாதிக்க வல்லரக்கும், அமெரிக்கா தலைமையிலான ஏகாதிபத்திய உலகுக்கும் விசுவாச அடியாளாகச் செயல்படுவதன் மூலம் அந்நிய முதலீடுகளை ஈர்த்து, இந்தியப் பெருமுதலாளிகள் தெற்காசிய வட்டகையில் தமது சந்தையை விரிவுபடுத்தி, நாட்டை "வல்லரசாக்க' விழைகிறார்கள். அதற்காக நாட்டை விற்கவும் அவர்கள் தயங்குவதில்லை. ஒபாமாவின் வருகையும் போடப்பட்டுள்ளள ஒப்பந்தங்களும் இந்த உண்மையை மீண்டும் நிரூபித்துக் காட்டுகின்றன.

 

• மனோகரன்

விக்கிலீக்ஸ் தோண்டியெடுத்த அடுத்த பூதம்!

இந்தியா, இசுரேல், ரசியா, துருக்கி, கனடா, பிரிட்டன் ஆகிய நாடுகளிலுள்ள அமெரிக்கத் தூதரகங்கள், அந்நாடுகளின் நிலவரம் பற்றி அமெரிக்க உள்துறை அமைச்சகத்துக்கு அனுப்பியிருந்த இரகசியக் கடிதங்களை, விக்கிலீக்ஸ் இணையதளம் வெளியிடத் தொடங்கியிருக்கிறது.

 

இந்த இரகசிய ஆவணங்கள் அமெரிக்காவின் மேலாதிக்க நோக்கங்களையும், அதன் திமிரையும் வெட்டவெளிச்சமாக்கும் என்பதால், அமெரிக்க அரசு விக்கலீக்ஸ் நிர்வாகத்தை மிரட்டி இந்த ஆவணங்கள் வெளிவராமல் தடுக்க எடுத்த முயற்சி தோல்வியில் முடிந்துபோனது.

 

அமெரிக்கத் தூதரகங்கள் பல்வேறு நாடுகளில் உளவு அமைப்பைப் போலச் செயல்பட்டு வருவதும், ஜ.நா. மன்றத்தின் உயர் அதிகாரிகளைக்கூட அமெரிக்கா உளவு பார்த்துவருவதும் இப்பொழுது எவ்விதச் சந்தேகத்திற்கும் இடமின்றி அம்பலமாகிவிட்டது.

 

இந்தியாவிற்கும், அமெரிக்காவிற்கும் இடையே நடந்து வந்த அணுசக்தி ஒப்பந்தம், இராணுவக் கூட்டுறவு குறித்த பேச்சுவார்த்தைகள் பற்றி இந்தியாவிலுள்ள அமெரிக்கத் தூதரகம் அனுப்பியிருக்கும் கருத்துகள் இதன் மூலம் அம்பலத்துக்கு வரும் எனக் கூறப்படுகிறது. இதன் விளைவாக, இந்திய அரசின் அமெரிக்க அடிமைத்தனம் மேலும் அம்பலமாகக் கூடும் என்பதால் இந்திய வெளி யுறவுத்துறை அமைச்சுகளும் அதிகாரிகளும் அரண்டு போய்யுள்ளனர்.

நகரமானது, கடலூர் நகரம்!

கடலூர்நகரமா, இல்லை நரகமா எனக் கேட்குமளவுக்கு, அந்நகரில் அரைகுறையாக இருந்துவந்த அடிக்கட்டுமான வசதிகள் அனைத்தும் சிதைக்கப்பட்டுவிட்டன. பாதாளச் சாக்கடை அமைப்பது என்ற பெயரில் அந்நகரையே பாதாள உலகமாக மாற்றிவிட்டது, நகராட்சி நிர்வாகம். பாதாளச் சாக்கடை அமைப்பதற்காக நகரில் ஒரு இடம்கூடப் பாக்கியின்றி அனைத்துச் சாலைகளையும் தெருக்களையும் நகராட்சி குதறிப் போட்டிருப்பதால், போக்குவரத்து, குடிநீர், மின்சாரம், கழிவு நீர் வரத்து உள்ளிட்ட அனைத்து வசதிகளும் நகரமெங்கும் சீர்கெட்டுக் கிடக்கின்றன.

 

மூன்று வருடங்களுக்கு முன்பு தொடங்கப்பட்ட இப்பாதாள சாக்கடைத் திட்டம் ஆமை வேகத்தில்கூட நகரவில்லை. 66 கோடி ரூபாய் முதலீட்டில் தொடங்கப்பட்ட இத்திட்டம், அதிகார வர்க்கத்திற்கும் ஒப்பந்தக்காரர்களுக்கும் பணம் காய்க்கும் மரமாக மாறிவிட்டது.

 

இதுவொருபுறமிருக்க, ஆட்டோ ஓட்டுநர்கள், கட்டிடத் தொழிலாளர்கள் போன்ற வேலைகளுக்குச் செல்லும் அடித்தட்டு மக்கள் வாழ்ந்து வரும் தானம் நகர், நவநீதம் நகர், சங்கர நாடார் தெரு, கம்மியம்பேட்டை ரோடு ஆகிய பகுதிகள் நகராட்சி நிர்வாகத்தால் அடியோடு புறக்கணிக்கப்பட்டுவிட்டன. அப் பகுதிகளில் ஒழுங்கான சாலை கிடையாது, கழிப்பறை கிடையாது, மின்சாரம் கிடையாது. பன்றித் தொழுவங்களைவிடக் கேடுகெட்டுப் போன இடத்தில் உழைக்கும் மக்கள் வாழ நிர்பந்திக்கப்படுகின்றனர்.

 

இந்த அவலத்தைக் கண்டித்தும், பாதான சாக்கடைத் திட்டத்தை விரைந்து நிறைவேற்றக் கோரியும் கடலூர் நகரில் செயல்பட்டு வரும் புரட்சிகர மாணவர் இளைஞர் முன்னணியும் புதிய ஜனநாயகக் கட்டுமான தொழிலாளர் சங்கமும் இணைந்து 22.11.2010 அன்று, தானம் நகர் பெட்ரோல் பங்க் அருகில் கண்டன ஆர்ப்பாட்டமொன்றை நடத்தின. இக்கண்டன ஆர்ப்பாட்டத்தில் இப்புரட்சிகர அமைப்புகளைச் Nர்ந்த தோழர்கள் மட்டு மின்றி, கடலூர் நகரப் பேச்ரிமைக் கழகத்தைச் சேர்ந்த திரு.செல்வம், மனித உரிமை பாதுகாப்பு மைய வழக்குரைஞர் செந்தில்குமார், ம.தி.மு.க.வின் 24 ஆவது வட்டப் பிரதிநிதி திரு.கே.துரை ஆகியோரும் கண்டன உரையாற்றினர்.

 

இதே கோரிக்கையை முன்வைத்து கடலூர் அனைத்து மோட்டார் வாகனத் தொழிற்சங்கங்களின் கூட்டமைப்பு 23.11.2010 அன்று கடலூர் நகரில் நடத்திய முழு அடைப்புப் போராட்டத்திலும் இப்புரட்சிகர அமைப்புகள் பங்கு கொண்டன. முழுஅடைப்பு நாளன்று பேரணியில் கலந்து கொள்வதற்காக வந்திருந்த பு.மா.இ.மு. மாவட்ட அமைப்பாளர் தோழர் பாலுவையும் இந்தியக் கம்யூனிஸ்ட் கட்சி நிர்வாகி மன்னாதனையும் பேரணி தொடங்குவதற்கு முன்பே போலீசார் கைது செய்து இழுத்துச் சென்றனர். அதன் பின், பேரணியைப் பாதிவழியிலேயே மறித்த போலீசார், 300க்கும் மேற்பட்டோரைக் கைது செய்தனர். எனினும், பேரணியில் கலந்துகொண்ட பலர் போலீசாரிடமிருந்து தப்பித்து, ஜவான்ஸ் பவன் அருகே சாலை மறியலில் ஈடுபட்டு போலீசாரின் முகத்தில் கரியைப் பூசினர். பொதுமக்கள் அடிப்படை வசதிகள் கோரி சட்டபூர்வமான வழியில் போராடுவதைக்கூட தி.மு.க. அரசால் சகித்துக் கொள்ள முடிவதில்லை என்பதைத்தான் இந்த அடக்குமுறை எடுத்துக் காட்டுகிறது. பு.ஜ. செய்தியாளர், கடலூர்.

அமெரிக்க பயங்கரவாதம்: புதைக்கப்பட்ட உண்மைகள் பூதமாகக் கிளம்பின!

அமெரிக்க மேல்நிலை வல்லரசு, தீவிரவாதத்திற்கு எதிரான போர் என்ற பெயரில் ஆப்கானிலும், ஈராக்கிலும் கடந்த பத்து வருடங்களாகப் பேரழிவுப் போர்களை நடத்திவருகிறது. இரட்டைக் கோபுரத் தாக்குதலுக்குக் காரணமான அல்கயிதா அமைப்பை ஒழிப்பதையும், அவர்களுக்கு ஆதரவு தரும் தலிபான்களை ஒடுக்குவதையும் காரணம் காட்டி முதலில் ஆப்கான் மீது அமெரிக்கா படையெடுத்தது. பின்னர், பேரழிவு ஆயுதங்களை மறைத்து வைத்திருக்கிறது எனப் பச்சையாகப் பொய் சொல்லி, ஈராக் மீது போர் தொடுத்தது.

 

முடிவின்றி நீண்டுகொண்டே செல்லும் இந்தப் போர்களில் அமெரிக்கக் கூட்டணிப் படையினர் பல மனித உரிமை மீறல்களையும், போர்க் குற்றங்களையும் செய்துள்ளனர். அபுகிரைப் சிறைச் சித்திரவதை துவங்கி, குவாண்டனாமோ சிறைச்சாலை வரை அமெரிக்காவின் பல போர்க்குற்றங்கள் தொடர்ந்து அம்பலப்படுத்தப்பட்டிருக்கின்றன. அத்தகைய குற்றச்சாட்டுகளை மறுப்பது, திசை திருப்புவது போன்ற வழிமுறைகளைக் கையாண்டு, அவற்றிலிருந்து தப்பி வந்திருக்கிறது அமெரிக்க அரசு. ஆனால், இதுவரை இல்லாத அளவிற்கு, மிகப்பெரிய அளவில் அமெரிக்காவின் போர்க்குற்றங்களை நிருபிக்கின்ற அந்நாட்டு இராணுவத்தின் இரகசிய ஆவணங்கள் தற்போது வெளியாகியுள்ளன.

 

சர்வதேச அளவில், பல்வேறு நாட்டு அரகளின் இரகசிய ஆவணங்களை அம்பலமாக்கும் 'விக்கிலீக்ஸ்' எனப்படும் இணையதளம், கடந்த ஜூலை மாதம் 'ஆப்கான் போர்க் குறிப்புகள்' என்ற பெயரில், அமெரிக்க இராணுவத்தின் நாற்பதாயிரம் இரகசிய ஆவணங்களை வெளியிட்டது. அதே இணையதளம் கடந்த அக்டோபர் இறுதியில், 'ஈராக் போர்க் குறிப்புகள்' என்ற பெயரில், 4 இலட்சம் ஆவணங்களை வெளியிட்டுள்ளது.

 

இந்த ஆவணங்கள் அனைத்தும் போர்க்களத்தில் அமெரிக்க இராணுவ வீரர்களால் பதிவு செய்யப்பட்டு, ஒன்றாகத் தொகுக்கப்பட்டுப் பாதுகாக்கப்படும் இரகசியக் குறிப்புகள். 2004ஆம் ஆண்டு முதல் 2009ஆம் ஆண்டு டிசம்பர் வரையிலான காலக்கட்டத்தில், ஆப்கான் மற்றும் ஈராக்கில் அமெரிக்க இராணுவம் மேற்கொண்ட நடவடிக்கைகள் குறித்த தகவல்களும், அதில் கொல்லப்பட்டவர்களின் எண்ணிக்கையும் இதில் பதிவாகியுள்ளன. மேலும் அமெரிக்கக் கூட்டணிப்படையினரின் நடவடிக்கைகள், தனியார் பாதுகாப்பு நிறுவனங்களின் குற்றங்கள் பலவும் இதில் பதிவாகியுள்ளன. தனது மேலாதிக்க நலன்களுக்காக அமெரிக்க அரசு எத்தகைய கொடிய இழிவான செயல்களிலும் ஈடுபடும் என்பதை இந்த ஆவணங்கள் ஆதாரபூர்வமாக அம்பலப்படுத்துகின்றன.

 

விக்கி லீக்ஸ் வெளியிட்டுள்ள அமெரிக்க இராணுவத்தின் கோப்புகள், ஆப்கானில் இருபதாயிரம் பொது மக்களும், ஈராக்கில் 66 ஆயிரத்திற்கும் அதிகமான பொது மக்களும் கொல்லப்பட்டுள்ளதாகக் கூறுகின்றன. சர்வதேச பொதுமன்னிப்பு சபை உள்ளிட்ட அமைப்புகள் கொல்லப்பட்ட பொதுமக்களின் எண்ணிக்கையை இலட்சங்களில் கூறுகின்றன. அவற்றைக் காட்டிலும் தற்போது விக்கிலீக்ஸ் மூலம் வெளிவந்திருக்கும் அமெரிக்க இராணுவத்தின் கொலைக்கணக்கு மிகவும் குறைவுதான் என்றபோதிலும், தனது இராணுவத்தால் தொகுக்கப்பட்டிருக்கும் படுகொலைப் பட்டியலைக்கூட இருட்டடிப்பு செய்து, கொலைக்கணக்கை அமெரிக்க இராணுவம் மேலும் குறைத்துக் காட்டியிருப்பது விக்கி லீக்ஸ் மூலம் அம்பலமாகியிருக்கிறது.

 

இதுவரை உலகத்துக்குத் தெரிந்திராத பல படுகொலைகளையும் இந்த ஆவணங்கள் வெளிக்கொணர்ந்துள்ளன. 2008ஆம் ஆண்டு அக்டோபர் மாதம் ஆப்கானில், பிரான்ஸ் நாட்டு இராணுவத்தால் ஒரு பேருந்து நிறைய பொதுமக்கள் படுகொலை செய்யப்பட்டுள்ளனர். இதற்கு இரண்டு மாதம் கழித்து அதே போன்றதொரு சம்பவத்தில் பலர் அமெரிக்க இராணுவத்தால் கொல்லப்பட்டுள்ளனர்.

 

சர்வதேச செய்தி நிறுவனமான ராய்டர்சின் நிருபர்கள் இருவரை ஈராக்கில் அமெரிக்க ஹெலிகாப்டர் சுட்டு வீழ்த்தியதும், அந்த நிருபர்களுக்கு உதவ ஓடி வந்த ஒரு சிறுமி உட்பட அப்பாவி பொதுமக்கள் பலரையும் அமெரிக்கச் சிப்பாய்கள் சுட்டுக் கொன்றதும் வீடியோ ஆதாரங்களுடன் வெளியாகியுள்ளன. இந்தச் சம்பவம் நடைபெறுவதற்கு சில மாதங்களுக்கு முன்பு அதே ஹெலிகாப்டர் வீரர்கள், கையை உயர்த்திச் சரணடைய வந்த பொதுமக்களைச் சுட்டுக் கொன்றுள்ளனர்.

 

ஆப்கானில் அமெரிக்காவிற்கு எதிராகப் போரிடும் தலிபான் தலைவர்களைக் குறிவைத்துக் கொல்வதற்கென பிரத்யேகமாக ஒரு இராணுவக் குழுவையே அமெரிக்கா அமைத்துள்ளது. ""அதிரடிப்படை 373'' எனப்படும் இந்தக் குழு, தலிபான் தலைவர்களைக் கொல்வது என்ற பெயரில் அப்பாவி பொதுமக்களை கொன்றுவருவதையும் விக்கிலீக்ஸ் அம்பலப்படுத்தியிருக்கிறது. தலிபான் தலைவர்கள் ஏதாவதொரு நகரத்தில் தங்கியிருப்பதாகத் தகவல் கிடைத்தால் உடனே அந்த நகரத்தை நோக்கி ஆளில்லா உளவு விமானங்களை அனுப்பி ஜம்பதாயிரம் அடி உயரத்திலிருந்து குண்டுகளைக் கொட்டி மொத்தப் பகுதியையும் உருத்தெரியாமல் அழித்துவிடுவது என்பதை ஒரு வழிமுறையாகவே அமெரிக்க இராணுவம் கடைப்பிடித்து வருகிறது. இத்தகைய தாக்குதல்களில் ஆயிரக்கணக்கில் அப்பாவி ஆப்கானியர்கள் கொல்லப்பட்டுள்ளனர்.

 

இவ்வாறு வெளிப்படையாக அப்பாவிகளைக் கொன்று குவித்தது மட்டுமல்லாமல், மக்களிடையே பிரிவினையைத் தூண்டி நிரந்தரமாக அவர்களை மோதவிடும் சதியையும் அமெரிக்கா செய்து வருகிறது. ஈராக்கில் சியா, சன்னி பிரிவினரிடையே பகைமையைத் தூண்டும் வகையில் சன்னி பிரிவினரின் மீது தாக்குதல்களைக் கட்டியமைத்துள்ளது. பாக்தாத் நகரின் சேரிகளிலிருந்து பொறுக்கியெடுக்கப்பட்ட சியா பிரிவு குண்டர்களைக் கொண்டு ""ஓநாய் படை'' என்ற கொலைகாரப் படையை உருவாக்கி, சன்னி பிரிவினரின் மீது தாக்குதல் தொடுத்து, கலவரங்களைத் தூண்டி வருகிறது. இலத்தின் அமெரிக்க நாடுகளில் செய்ததைப் போன்று இப்படையினருக்கும் சித்திரவதை செய்வதற்குத் தனியாகப் பயிற்சி கொடுத்து வளர்க்கிறது.

 

"ஓநாய் படையினரின்'' கையில் சிக்குவதைவிடச் செத்துவிடலாம் என நினைக்கும் வகையில் அப்படையினரின் சித்திரவதைகள் கொடூரமாக இருக்கின்றன. கண்களைத் நோண்டுவது, கைகால்களில் ஓட்டை போடுவது. விரல்களை ஒவ்வொன்றாக வெட்டுவது, உயிருடன் தோலை உரிப்பது எனக் காட்டுமிராண்டித்தனமான சித்தரவதைகளை, அமெரிக்கா அப்படையின் மூலம் செய்து வருகிறது. ஓநாய்ப் படையினரின் அட்டகாசத்தின் காரணமாக சியா பிரிவு மக்களுக்கு எதிராக சன்னி பிரிவினர் தாக்குதல் தொடுத்ததும், இதன் விளைவாக இரத்த ஆறு ஓடியதும் இராணுவ ஆவணங்களில் பதிவாகியுள்ளது.

 

ஈராக்கின் ஓநாய்ப் படையைப் போன்றே ஆப்கானின் பாதுகாப்புப் படையையும் அமெரிக்கா பயிற்றுவித்துள்ளது. அப்பாவிப் பொதுமக்களைச் சுட்டுக் கொல்வது முதல் போதைமருந்து கடத்தல், கோஷ்டி மோதல் வரை அமெரிக்கப் படைகளால் பயிற்றுவிக்கப்பட்ட ஆப்கான் பாதுகாப்புப் படையினர் நிகழ்த்திய பல அட்டூழியங்கள் தற்போது வெளியாகியுள்ளன.

 

சித்திரவதை குறித்தும் மனித உரிமைகள் மீறப்படுவது குறித்தும் சர்வதேச அளவில் எழும் கண்டனங்களிலிருந்து தப்பித்துக் கொள்வதற்காகவே, இது போன்ற கூலிப்படையினரை அமெரிக்கா பயிற்றுவித்து வளர்க்கிறது என்ற உண்மையும் இந்த ஆவணங்கள் மூலம் ஆதாரபூர்வமாக அம்பலமாகியிருக்கிறது. மேலும், இவர்கள் குறித்து அமெரிக்க இராணுவத்திற்கு 20,000க்கும் அதிகமான புகார்கள் வந்தபோதும் அவற்றைப் பற்றி விசாரிக்காமல், சம்பந்தப்பட்ட படையினரிடமே அந்தப் புகார்களை அனுப்பிவிடும்படி அமெரிக்க அரசே இராணுவத்திற்கு உத்தரவிட்டுள்ளது.

 

ஈராக் போரை நியாயப்படுத்த அமெரிக்கா கூறிய பொய்களில் ஒன்று, அல்கயிதாவிற்கு சதாம் உசேன் ஆதரவளித்தார் என்பதாகும். இரட்டைக் கோபுரத் தாக்குதலுக்கு அல்கயிதாவினர் ஈராக்கிலிருந்துதான் திட்டமிட்டனர் என்ற பொய்யை அமெரிக்கா பிரச்சாரம் செய்தது. ஆனால், உண்மையில் சதாம் ஆட்சி செய்தவரை ஈராக்கில் அல்கயிதா இயக்கமே இல்லை. அமெரிக்கா ஈராக்கை ஆக்கிரமித்த பின்னர் தான் அங்கே அல்கயிதா இயக்கமே தோன்றியது. 'மெசபடோமியா அல்கயிதா' என்ற பெயரில் இயங்கிவரும் அந்த அமைப்பு, அமெரிக்காவிற்கு உதவும் சியா பிரிவு மக்களைக் கொல்வதையே நோக்கமாகக் கொண்டு செயல்பட்டுவருகிறது. சியா மற்றும் சன்னிப் பிரிவினர் தமக்குள் அடித்துக் கொண்டு சாவதை உத்திரவாதப்படுத்துவதற்காக அல்காய்தாவின் நடவடிக்கைகளை அமெரிக்க இராணுவம் மறைமுகமாக ஊக்குவித்திருக்கிறது என்பதையும் விக்கி லீக்ஸ் அம்பலப்படுத்துகிறது.

 

பாகிஸ்தானின் உளவு அமைப்பான ஐஜ.எஸ்.ஜ., ஆப்கானில் உள்ள தலிபான்களின் ஒரு பிரிவைக் கட்டுப்படுத்துகிறது என்பது அப்பட்டமாகத் தெரிந்த நிலையிலும் அமெரிக்கா அதனை அனுமதித்து வருகிறது என்பதும் இந்த ஆவணங்களில் பதிவாகியுள்ளது. தீவிர வாதத்திற்கு எதிரான போரில் ஈடுபடுவதற்காக பாகிஸ்தானுக்கு அமெரிக்கா கொடுக்கும் நிதி உதவிகளை, ஜ.எஸ்.ஜ., தலிபான்களுக்கு மடைமாற்றிவிடுகிறது என்பதும்; பாகிஸ்தானின் இராணுவ ஜெனரல் கயானி, தலிபான்களுக்கு உதவும் ஜ.எஸ்.ஜ. பிரிவுக்குத் தலைமை தாங்குகிறார் என்பதும் தெளிவாகத் தெரிந்திருந்தும், ஒபாமாவின் அரசு அவரது பதவியை மேலும் மூன்று ஆண்டுகளுக்கு நீட்டிக்க பாகிஸ்தானை நிர்பந்தப்படுத்தியது.

 

பாகிஸ்தானைப் பயன்படுத்தி, அமெரிக்க ஆதரவு "நல்ல தலிபான்களை' உருவாக்க அமெரிக்க எடுத்துவரும் முயற்சிகளும் ஆதாரபூர்வமாக அம்பலமாகியிருக்கின்றன. ஜப்பான் உள்ளிட்ட கூட்டணி நாடுகளின் உதவியோடு முப்பது கோடி டாலர் நிதியைத் திரட்டி, தலிபான்களின் இரண்டாம் கட்டத் தலைவர்களை வழிக்குக் கொண்டுவரத் திட்டமிட்டுள்ளது. இம் முயற்சிக்குத் தடையாக இருக்கும் தலைவர்களைக் கொல்லவும், அமெரிக்காவை ஆதரிக்கும் இரண்டாம் மட்டத் தலைவர்களை மேலே கொண்டுவரவும் திட்டமிட்டுள்ளது. தான் கொடுக்கின்ற நிதியுதவி மற்றும் ஆயுதங்களின் மூலம் தலிபான்கள் அமெரிக்கச் சிப்பாய்களைக் கொல்கின்றனர் என்பது தெரிந்தேதான் இந்த அழுகுணி ஆட்டத்தை அமெரிக்க அரசு ஆடிவருகிறது.

 

இரண்டாம் உலகப்போருக்குப் பின் நாஜிப்படையின் போர்க்குற்றங்களை நூரம்பர்க் விசாரணை ஆதாரங்களுடன் நிரூபித்து, குற்றவாளிகளைத் தண்டித்தது. இன்றோ,மற்றவர்கள் யாரும் ஆதாரம் தந்து நிரூபிக்கும் தேவையே இல்லாமல், எல்லாப் போர்க் குற்றங்களுக்கும் ஒப்புதல் வாக்குமூலம் தருகின்றன விக்கி லீக்ஸ் வெளியிட்டுள்ள அமெரிக்க இராணுவ ஆவணங்கள். இருப்பினும், பிற ஏகாதிபத்தியங்கள் அமெரிக்காவுடன் கூட்டுக் களவாணித்தனத்தில் ஈடுபட்டிருப்பதாலும், தட்டிக் கேட்பாரில்லாத தனிப்பெரும் ரவுடியாக அமெரிக்கா உலகை மேலாதிக்கம் செய்து வருவதாலும், இந்த போர்க் குற்றங்களுக்காக அமெரிக்காவை விசாரணைக் கூண்டில் ஏற்ற முடியாத நிலைமை உள்ளது.

 

அமெரிக்காவின் முன்னாள் அதிபரான ஜுனியர் புஷ், தனது பதவிக்கால நினைவுகளைத் தொகுத்து எழுதியுள்ள ""தீர்மானக் குறிப்புகள்'' என்ற நூலில், ""உலகளவில் தடை செய்யப்பட்டுள்ள சித்திரவதைகளை ஏவிவிட்டதன் மூலம்தான் வெளிநாடுகளில் உள்ள அமெரிக்கத் தூதரகங்கள், இலண்டனில் உள்ள ஹீத்ரு விமான நிலையம் உள்ளிட்ட பல்வேறு முக்கியத்துவம் வாய்ந்த இடங்களைப் பயங்கரவாதிகள் தாக்கத் திட்டமிட்டிருந்ததை அறிந்து கொள்ள முடிந்தது'' எனக் குறிப்பிட்டு, இத்தகைய போர்க் குற்றங்கள் அனைத்தையும் நியாயப்படுத்தியிருப்பதோடு, இதற்கு எதிராக எழும் கண்டனங்களை எள்ளி நகையாடியிருக்கிறார். தற்பொழுது அமெரிக்காவின் உள்துறை செயலராக இருக்கும் ஹிலாரி கிளிண்டன், ""இராணுவ இரகசியங்களை அம்பலப்படுத்துவது அமெரிக்கத் தேச நலனுக்கு எதிரானது'' எனக் குறிப்பிட்டு, விக்கிலீக்ஸ{க்கு எதிராக அமெரிக்கத் தேசிய வெறியைத் தூண்டிவிட முயலுகிறார். கருப்பின அதிபர் ஒபாமாவோ இந்தப் போர்க் குற்றங்களைப் பற்றியெல்லாம் அலட்டிக்கொள்ளாமல், ஆப்கான் மீதும், பாகிஸ்தானின் எல்லைப்பகுதிகள் மீதும் நடத்தப்படும் ஆளில்லா விமானத் தாக்குதல்களை முன்னைவிடத் தீவிரப்படுத்தி வருகிறார்.

 

 

விக்கி லீக்ஸ் ஆவணங்களை அமெரிக்க அரசு பொய்யென்று மறுக்கவுமில்லை; அதற்காக வெட்கித் தலைகுனியவுமில்லை மாறாக, இவ்வாறு உண்மைகளை வெளியிடுவதைக் குற்றம் எனத் திமிருடன் கூறி, இதனை வெளியிட்ட விக்கி லீக்ஸ் நிறுவனர் அசங்கி மீது பாலியல் வன்புணர்ச்சி வழக்கொன்றைப் புனைந்திருக்கிறது. மேலும், அவரைத் தேடிப் பிடிக்க சர்வதேசப் பிடியாணையையும் பிறப்பித்திருக்கிறது. குற்றத்தை அம்பலப்படுத்தியவர் ஓடி ஒளிந்துகொண்டிருக்க, குற்றவாளி அமெரிக்காவோ அவரைத் துரத்திக் கொண்டிருக்கிறது.

 

• அழகு ..